Filmi horror shqiptar “Bloodlands”, me skenar dhe regji nga Steven Kastrissios, nën interpretimin e aktorëve Gëzim Rudi, Ilire Vinca, Suela Bako, Alesia Xhemalaj, Emiljano Palali, Dritan Arbana, Florist Bajgora, Enxhi Cuku, do të hapë Festivalin e Filmit Horror në Sydney të Australisë, që nis më datë 29 nëntor.

“Bloodlands” është shfaqur gjithashtu në “Horror Channel Fright Fest Glasgow” dhe në “Nashville Film Festival”, ku Suela Bako u vlerësua me çmimin aktorja më e mirë.

Filmi tregon historinë e një gruaje, e cila dhunohet, mbetet shtatzënë dhe stigmatizohet nga banorët e lagjes së saj. Ajo largohet në mal, ku edhe shndërrohet në një shtrigë të vërtetë, e cila mbledh rreth vetes një grup njerëzish, të cilët njëlloj si asaj shoqëria u ka kthyer shpinën. Së bashku me grupin e saj ajo vendoset që të kthehet dhe të fillojë hakmarrjen. Ngjarja zhvillohet në periferi të kryeqytetit të Shqipërisë, Tiranë.

Në gjithë këtë ngjarje dhe në luftën kundër shtrigës dhe klanit të saj përfshihet edhe familja e një kasapi, fëmijët e të cilit edhe pse më mendime të kundërta kundër babait të tyre tradicional, duhet që të bëhen së bashku në mënyrë që të kenë shanse të shpëtojnë.