Kim Kardashian është imazhi i koleksionit të ri të Balenciaga-s dhe ndonëse sapo është bërë zyrtare , lajmi nuk ishte surprizë për kritikët e modës. Duke marrë parasysh marrëdhënien e saj me drejtorin kreativ të Balenciaga-s, Demna Gvasalia, duket thjeshtë si kulmi i shumë momenteve publike që kemi parë vitin e kaluar. Kujtojmë Met Gala-në e 2021-shit ku Kim u paraqit në tapetin e kuq me një veshje të veçantë, totalisht e mbuluar, nga Balenciaga.

Fotografuar nga Stef Mitchell në shtëpinë e saj në Calabasas, Kardashian modelon tre veshjet kryesore që afrohen shumë me stilin e saj personal. Në një imazh, ajo pozon me një kostum të zi me një nga çantat më të njohura të markës, La Cagole. Në të dytën, ajo është një biznesmene me një pallto leopardi, çizme dhe një La Cagole të zezë në dorë. Në të fundit, ajo shfaqet me një pallto të madhe me supe të mprehta, të përfunduara me syze dielli të errëta, çizme me majë dhe mini çantën Hourglass.

Në pjesën e dytë të Koleksionit të Pranverës 2022 ishin pjesë edhe aktorja franceze Isabelle Huppert dhe modelët Tommy Blue dhe Marie-Agnès Diene.